البداية

البداية

برج الجامعة معلم تشتهر فية الجامعة

البداية  وما أدراك ما البداية .. زي ما قلت لكم في اول تدوينه لي راح أكتب تجربتي الجميلة (الى  الأن) > واضح متفائل ، الله لا يضرني😉 المهم راح أكتب السمستر الأول(الترم الأول تعرفون لازم إنجليزي وكيذا ) على شكل حلقات منفصلة وأيضاً بعطي رأيي عن المدرسين بشكل منفصل في تدوينات أخرى .

في تدوينة اليوم بكتب عن الأحداث ألي صارت لي من الثانوية ألين الأسبوع التعريفي بحاول أكتب كل التفاصيل ألي أتذكرها وأعذروني على الأسلوب النايم😥😥

بديت الثانوية على عكس كثير من أقراني ، كنت متحمس لها الأني عارف أنها بتكون أحلى أيام حياتي وفعلاً عشت السنة الأولى وكانت جداً رائعة قابلت في ناس كثير ونظرتي للعالم تغيرت ورحت  بعدها للسنة الثانية وتغيرت في أكثر .  عقلياُ وجسدياً وبعدها أتت السنة المؤلمة سنة التخرج !، أغلب الطلاب يحبون ثالث ثانوي وفي نفس الوقت يكرهونه الأن في هذي السنة راح نواجهة الواقع المؤلم ألا وهوو التخرج ، لازم نقرر على وين نوجهة  قطاع عسكري ، علمي ، شرعي كلنا حيرانين ومع الأسف نادراً ما تحصل من يقودك في هذي الدوامة من الفوضى ، حاولت أعيش الترم الأول متجاهل حقيقة التخرج كل ألي أبغاه أني أستمتع في أخر أيامي من الثانوية لكن مع الأسف مع كل اليوم الأسئلة تكثر أيش تبغى تتخصص ؟ على أي جامعة بتروح ؟ ألخ... خلص الترم الأول بسرعة حتى الشتاء الي كنا نعيشة في ذيك الفترة بدء  بالموت وكأنه يحذرنا من حرق شمس الصيف ، ما حكيت لكم عن مستواي صح ؟ أنا بشكل عام طالب أفرج (متوسط) أنا أعتبرني نفسي طالب عادي أذاكر وأحصل مجهودي لكن برغم من كوني "أفرج" الناس يصنفوني من الدوافير يمكن عشان هيئتي أو أصحابي ؟  المهم أن درجاتي كانت تأهلني لدخول أغلب الجامعات المملكة لكن مع الأسف في ذاك الوقت كنت لسى ما اعرف أي طريق أروح معه ......

بقي شهر وأسبوع ويخلص الترم الثاني .. كنا مشغولين نجهز لأختبارات ولحفل التخرج وفوق كيذا تقديم الجامعات كثير من أخوياي كانو يفكرون يقدمون على جامعة الملك فهد للبترول والمعادن –  KFUPM     بصراحة ماكنت أعرف عنها الكثير ألا أنها ما تقبل ألا نخبة من الطلاب ، صدف في ذيك الفترة أن الجامعة مسوية  حاجة زي البرنامج  أسمة علماء الغد (الأسم كشخة الصراحة 😎) المهم جتني رسالة انا وأغلب أصحابي لحضور هذا البرنامج بصراحة وقتها ما كنت مقتنع بالجامعة أبداً حتى ما فكرت أعمل بحث دقيق لها ، عموماً رحنا للبرنامج وبصراحة غير وجهت نظري كثيراً للجامعة وأقنعني كثراً فيها.

تخرجت والحمد الله كنت مبسوط لكن في نفس الوقت حزين  ، راح أخوض تجربة جديدة لكنها مخيفة . حقيقة ان الجامعة بعيدة عن الرياض (400كم) كانت مسببة أزمة  لأهلي لدرجة أن الوالد الله يحفظة عرض علي أنة يشتري لي سيارة لو قعدت  ودرست في جامعة الملك سعودوهذا بالمناسبة كان عرض مغري  ... لكن كلا وألف كلا  راسي وقتها كان يابس وغير هذي الجامعة ما أبي في النهاية أضطر أبوي يتقبل الأمر الواقع ، وقتها النتائج طلعت والحمد الله كنت من المقبولين وكذالك أغلب العيال ألي معي من الثانوية

مر أغلب الصيف بسرعة وكان أخوكم في الله برى السعودية منحاش من حر جهنم كفانا الله وأياكم حرها ، المهم اضطريت  أن أترك أهلي مرغماً مكرها عشان حضرتها الجامعة مسوية الأسبوع التعريفي (ألي يعطون فية البطاقات الجامعية والبنكية والسكن ألخ..) رجعت الرياض وجهزت ملابسي ووقتها ما قصر ولد خالي هو والعيال ألا لزمو يجون معي للظهران .

حر ورطوبة لا تطاق بصراحة يا أهل الشرقية اعانكم الله على جوكم الخانق على الأقل في الرياض الحر يكون جاف موب رطب زيكم 😤😤😤، المهم أني رحت للجامعة مدرعم ولا أدري وين لأستقبال حق الأسبوع التعريفي ، من ذكائي قلت اكيد أنة في المول ، خليت ولد خالي ينزلني وودعتة ودرعمت للمول ويوم دخلت سبرااايز مافي  أستقبال ولا شيء !!! وقتها كنت جداً متوتر وأدق على خووي ألي هو رومميتي (شريكي في السكن)  وأرسلي أحداثيات مكان الأستقبال وياليته ما أرسل !

كان نصف ساعة مشي ومع الأجواء الجميلة ألي راح تسلقني حي  في الطريق ، ماكنت أعرف أحد هناك وولد خالي راح الدمام يدور له هو وعيال شقة ، فخويكم ماله ألا يمشي تحت شمس الظهر والله لا يوريكم حر يسلخ الظهر وفوق كيذا الرطوبة ألف

الحمد الله ما تميت خمس دقايق أمشي  ولا ويجيني أحد طلاب الجبل(طلاب التخصص) ويعرض علي توصيلة عاد انا ما صدقت خبر 😵😵😵😵وعلى طول جو السيارة أخخخ يا الفرق السيارة باااردة والمكيف يهفهف على وجهي وكأني في النعيم😇 المهم الرجال وصلني للمبنى حق الأستقبال مبني 54 والمعروف  بالمسلخ !!!  أسمة غريب وأغلب الظن بسبب لإشاعات ألي تقول أن الشرطة  لقو أحد الطلاب مسلوخ بالكامل هناك ومكتوب عنة بأحد الجرائد !!!  أمزح أمزح ^^" سمي بالمسلخ كناية على الطلاب ألي انسلخوا من الاختبارات طبعاً ما يحتاج أقول لكم أني انسلخت فيه  واجد😳😳

المسلخ !

 

بصراحة  طولنا عشان نخلص الإجراءات لكن الحمد الله في النهاية خلصناها كلها في يوم واحد على عكس بعض الجامعات ألي طولو جداً في هذي الإجراءات  .  المهم  هذي كانت أغلب الأحداث المهما ألي صارت لي من الثانوي ألين الأسبوع التعريفي أنشاء الله قريباً راح أكمل وأنزل أحداث أول سمستر لي كــ أوريااا ! .